ਜਲੰਧਰ(ਵਿਸ਼ਾਲ)-ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਸੱਭਿਆਚਾਰਕ ਵਿੰਗ ਨਾਲ ਜੁੜੇ ਲੇਖਕਾਂ, ਕਵੀਆਂ, ਤਰਕਸ਼ੀਲ, ਜਮਹੂਰੀ ਕਾਮਿਆਂ, ਸਾਹਿਤ ਅਤੇ ਕਲਾ ਖੇਤਰ ਨਾਲ ਜੁੜੇ ਵਿਅਕਤੀਆਂ ਦੀ ਮੀਟਿੰਗ ‘ਚ ਫ਼ੈਸਲਾ ਕੀਤਾ ਗਿਆ ਕਿ 29ਵਾਂ ਮੇਲਾ ਗ਼ਦਰੀ ਬਾਬਿਆਂ ਦਾ ਮੁਲਕ ਦੇ ਉਭਰਵੇਂ, ਭਖ਼ਦੇ ਮੁੱਦਿਆਂ ਉੱਪਰ ਵਿਚਾਰਾਂ, ਬਹੁ-ਵੰਨਗੀ ਕਲਾ ਕਿਰਤਾਂ ਅਤੇ ਪ੍ਰਬੰਧਾਂ ਪੱਖੋਂ ਸਫਲਤਾ ਪੂਰਵਕ ਨੇਪਰੇ ਚਾੜਿ੍ਹਆ ਜਾਵੇਗਾ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਜਨਰਲ ਸਕੱਤਰ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਗ਼ਦਰ ਪਾਰਟੀ ਦੇ ਬਾਨੀ ਪ੍ਰਧਾਨ ਬਾਬਾ ਸੋਹਨ ਸਿੰਘ ਭਕਨਾ ਦੀ 150ਵੀਂ ਜਨਮ ਵਰੇ੍ਹਗੰਢ ਨੂੰ ਸਮਰਪਤ ਇਸ ਮੇਲੇ ਮੌਕੇ ਯਾਦਗਾਰ ਹਾਲ ਨੂੰ ‘ਗ਼ਦਰੀ ਬਾਬਾ ਸੋਹਨ ਸਿੰਘ ਭਕਨਾ ਨਗਰ’ ਦਾ ਨਾਂ ਦਿੱਤਾ ਜਾਵੇਗਾ। ਮੇਲੇ ਦਾ ਵਿਸ਼ੇਸ਼ ਆਕਰਸ਼ਣ ਹੋਵੇਗਾ ਘਾਹ ਪਾਰਕ ‘ਚ 31 ਅਕਤੂਬਰ ਅਤੇ 1 ਨਵੰਬਰ ਲੱਗਣ ਵਾਲਾ ਪੁਸਤਕ ਮੇਲਾ।ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਪ੍ਰਧਾਨ ਅਜਮੇਰ ਸਿੰਘ ਦੀ ਪ੍ਰਧਾਨਗੀ ਹੇਠ ਹੋਈ ਮੀਟਿੰਗ ‘ਚ ਮੇਲੇ ‘ਚ ਪੇਸ਼ ਹੋ ਰਹੀਆਂ ਕਲਾ ਵੰਨਗੀਆਂ ਬਾਰੇ ਜਾਣਕਾਰੀ ਸਾਂਝੀ ਕਰਦਿਆਂ ਸਭਿਆਚਾਰਕ ਵਿੰਗ ਦੇ ਕਨਵੀਨਰ ਅਮੋਲਕ ਸਿੰਘ ਨੇ ਦੱਸਿਆ ਕਿ ਪਹਿਲੀ ਨਵੰਬਰ ਸਵੇਰੇ 10 ਵਜੇ ਝੰਡਾ ਲਹਿਰਾਉਣ ਦੀ ਰਸਮ, ਕੋਰਿਓਗ੍ਰਾਫੀਆਂ, ਗੀਤ-ਸੰਗੀਤ ਉਪਰੰਤ ਸ਼ਾਮ 3 ਤੋਂ 7 ਵਜੇ ਤਕ ਕੇਵਲ ਧਾਲੀਵਾਲ, ਡਾ. ਸਾਹਿਬ ਸਿੰਘ, ਅਨੀਤਾ ਸ਼ਬਦੀਸ਼, ਇਕੱਤਰ ਚੰਡੀਗੜ੍ਹ ਅਤੇ ਕੀਰਤੀ ਕਿਰਪਾਲ ਦੀ ਨਿਰਦੇਸ਼ਨਾਂ ਹੇਠ ਨਾਟਕ ਖੇਡੇ ਜਾਣਗੇ। ਇਨਕਲਾਬੀ ਕਵੀਸ਼ਰੀ ਜੱਥਾ ਰਸੂਲਪੁਰ, ਲੋਕ ਸੰਗੀਤ ਮੰਡਲੀ ਭਦੌੜ, ਨਵਦੀਪ ਧੌਲਾ, ਧਰਮਿੰਦਰ ਮਸਾਣੀ, ਨਰਗਿਸ, ਅੰਮਿ੍ਤਪਾਲ ਆਦਿ ਸੋਲੋ ਗੀਤ ਦਿਨੇ ਅਤੇ ਨਾਟਕਾਂ ਦੇ ਨਾਲ-ਨਾਲ ਪੇਸ਼ ਕਰਨਗੇ। ਮੇਲੇ ‘ਚ ਡਾ. ਸਵਰਾਜਬੀਰ ਅਤੇ ਡਾ. ਦੇਵਿੰਦਰ ਸ਼ਰਮਾ ਦੇ ਮੁੱਖ ਭਾਸ਼ਣ ਉਪਰੰਤ ਕਵੀ ਦਰਬਾਰ ਹੋਵੇਗਾ। ਮੇਲੇ ਦੀ ਪੂਰਵ ਸੰਧਿਆਂ ‘ਤੇ 31 ਅਕਤੂਬਰ ਸ਼ਾਮ 6 ਵਜੇ ਤਰਕਸ਼ੀਲ ਸ਼ੋਅ ਅਤੇ ਪੀਪਲਜ਼ ਵਾਇਸ ਵੱਲੋਂ ਿਫ਼ਲਮ ਸ਼ੋਅ ਹੋਵੇਗਾ। ਮੀਟਿੰਗ ‘ਚ ਸ਼ਾਮਲ ਸਭਨਾਂ ਸਖਸ਼ੀਅਤਾਂ ਨੇ ਮੇਲੇ ਦੀ ਸਫ਼ਲਤਾ ਲਈ ਪ੍ਰਚਾਰ, ਲਾਮਬੰਦੀ, ਪ੍ਰਬੰਧਕੀ ਕੰਮਾਂ ‘ਚ ਅੱਜ ਤੋਂ ਹੀ ਵੱਧ ਚੜ੍ਹਕੇ ਹਿੱਸਾ ਪਾਉਣ ਦਾ ਭਰੋਸਾ ਦਿੱਤਾ। 31 ਅਕਤੂਬਰ ਰਾਤ ਅਤੇ 1 ਨਵੰਬਰ ਸ਼ਾਮ ਨੂੰ ਮੇਲਾ ਸਮਾਪਤੀ ਉਪਰੰਤ ਮੀਟਿੰਗ ‘ਚ ਹਾਜ਼ਰ ਮੈਂਬਰਾਂ ਨੇ ਮੇਲਾ ਪ੍ਰਰੇਮੀਆਂ ਲਈ ਖਾਣੇ ਅਤੇ ਰਿਹਾਇਸ਼ ਦਾ ਪ੍ਰਬੰਧ ਕਰਨ ਲਈ ਦੇਸ਼ ਭਗਤ ਯਾਦਗਾਰ ਕਮੇਟੀ ਦਾ ਧੰਨਵਾਦ ਕੀਤਾ।